Бүген Татарстан мөфтие ТР мөселманнары Диния нәзарәтендә Биектау районының мөхтәрәм дин әһеле, озак еллар мөхтәсиблек эшен алып барган Хәбибуллин Галимулла Ярулла улын хөрмәтләде.
Камил хәзрәт Сәмигуллин Галимулла хәзрәтне 70 яшьлек юбилее белән тәбрикләде һәм Татарстан Республикасы мөселманнары Диния нәзарәтенең 25 еллыгы уңаеннан “Мөселман өммәте үсешенә өлеш керткән өчен” медале белән бүләкләде һәм чапан бүләк итте. Татарстан мөфтие Галимулла хәзрәткә сәламәтлек, күңел тынычлыгы, иминлек теләде.
Галимулла хәзрәт 1991-2011 елларда - Биектау районы мөхтәсибе, Биектау Үзәк мәчетендә имам-хатыйб булып эшли. Галимулла хәзрәт мөхтәсиб булып эшли башлаган 1990 елларда Биектау районында бер мәчет тә булмый, 2011 елларга аның саны кырык икегә җитә. Ул беренче мәхәлләләрне, беренче мәчетләрне ача, укыту эшләрен башлап җибәрә. Галимулла хәзрәт Биектау районында туып үсә, бар гомерен биектаулыларга хезмәт итүгә багышлый. Һөнәре буенча юрист булу өстенә, Уфа, Чистай, Казанның “Мөхәммәдия” һәм Ислам динен кабул итүгә 1000 ел исемендәге мәдрәсәләрне тәмамлый. Галимулла хәзрәтнең эшен бүгенге көндә Тәлгать хәзрәт Гайфуллин дәвам итә. Исегезгә төшерәбез, быел Биектауда узган районкүләм ифтар биш йөздән артык дин кардәшебезне Үзәк стадионга җыйды. Дин үсешендә Галимулла хәзрәтнең өлеше әйтеп бетергесез.
