Изге Рамазан аенда Бөгелмә шәһәре һәм Бөгелмә районы имам-мөхтәсибе Рамил хәзрәт Хөснетдинов Бөгелмә шәһәренең 3 нче тикшерү изоляторында булды. Ул биредә ифтар кылу өчен ашамлыклар һәм тоткыннарга намаз укырга өйрәтүче келәмнәр тапшырды.
– Рамазан аен догалар кылып мәчеттә яки өйдә гаилә әһелләре белән уздыру кабул ителгән, – ди Рамил хәзрәт. – Ә тоткыннар, тормышта хаталанып, әлеге Изге айда төрмәдә ялгыз утыралар. Бер яктан караганда, монда алар үзләренең үткән тормышлары, җибәрелгән хаталары турында фикерлиләр, гөнаһлардан тәүбә кылалар. Аларга безнең бүләкләребез ярдәм итәр дип уйлыйбыз.
Бөгелмә мөхтәсибәте 3 нче тикшерү изоляторында утыручы тоткыннарга ашамлыклар алырга һәм тапшырырга ярдәм итүчеләргә рәхмәтләрен җиткерә.
