Чистайда “Ягез, кызлар” клубы яшь мөслимәләре һәм аларның әти-әниләре өчен ифтар узды. Җирле мөслимәләр берлеге тарафыннан оештырылган мәҗлес гадәти булмаган квест форматында үтте. Клуб җитәкчесе Илһамия Шәрифуллина Коръән укыды, кызларга җәмгыятьтә актив һәм файдалы булуның әһәмияте турында вәгазь сөйләде. Шәһәрнең Мөслимәләр берлеге җитәкчесе Лиана Шаязданова шулай ук кызлар белән аларны борчыган темаларга әңгәмә корды. Аннары мөхтәсибәтнең мәдәният бүлеге вәкиле Регина Биктаһирова кунакларны ике командага бүлеп интеллектуаль викторина үткәрде. Квест ахырында кызлар Рамазан аеның символик фонарен кабызды.
Чистайда тагын бер ифтар гадәти булмаганча узды – ел дәвамында “Иман” мәчетендәге дәресләргә йөрүчеләр – балалар һәм әти-әниләр өчен чыгарылыш ифтары узды. Кичә имам-хатыйб Гадел хәзрәт Мөхәммәтшинның балаларны дөрес тәрбияләү турындагы вәгазе белән башланды һәм истәлекле бүләкләр бирү белән дәвам итте. Балаларның белемен квест ярдәмендә тикшерделәр. Мәҗлес авыз ачу белән төгәлләнде.
