Бүген Татарстан мөфтие Камил хәзрәт Сәмигуллинның кушуы буенча Мансур хәзрәт Җәләлетдинов Диния нәзарәтендә Апас һәм Лениногорск районнары мөхтәсибләре белән эшлекле очрашулар уздырды.
Очрашу барышында Мирхәт хәзрәт Җамалиев үткән Рамазан аена нәтиҗәләр ясады. “Көн саен Апас районы буенча дүрт меңнән артык кеше ифтар мәҗлесләрендә катнашты, 55 мәчеттә тәравих намазлары укылды. Төркиядән килгән Коръән-хафиз белән районның егермедән артык мәчетендә булдык”, – диде Мирхәт хәзрәт. Ул шулай ук Мансур хәзрәт белән Апас мөхтәсибәтендә имамнарга шәһадәтнамәләр тапшыру көнен билгеләү турында сөйләште.
Лениногорск мөхтәсибе Исмәгыйль хәзрәт Сингатуллин да райондагы дини вәзгыять белән таныштырды. Мөфти урынбасары Диния нәзарәтенең чираттагы Пленумын Лениногорск шәһәрендә үткәрү теләге барлыгын җиткерде һәм шушы чарага әзерлек буенча эш башларга килештеләр.
