Кичә Шәһре Болгарда узган җыенда Казаннан һәм Болгардан 9 инвалид катнашты, алар бары коляска белән генә йөри алалар. Инвалидларның әлеге чарада катнашуын Татарстан мөселманнары Диния нәзарәте хезмәткәрләре Татарстан мөфтие Камил хәзрәт Сәмигуллин карары белән оештырды. Татарстан мөселманнары Диния нәзарәте һәм “Зәкят” хәйрия фонды автобусларында аларны Болгар җыенына алып килделәр һәм мөфтият чатырында ике тапкыр ашаттылар.
Инвалидларның әлеге чарадан алган хис-кичерешләре аларның физик, эмоциональ һәм психик торышында уңай чагылыш табар дип ышанабыз, ә әлеге хатирәләр аларның күңелендә тагын күп еллар дәвамында сакланыр. Инвалидлар Татарстан мөфтиенә һәм Изге Болгар җыенын оештыручыларга рәхмәтләрен җиткерделәр.
