Бүген Казан шәһәре имамнары республикабыз мөфтие Камил хәзрәт Сәмигуллин җитәкчелегендә Вахитов районының “Трудовые резервы” стадионына җыелды. Биредә алар беренче тапкыр “Хезмәткә һәм оборонага әзер” Россиякүләм физкультура-спорт комплексы сынау нормативларын тапшыруда катнаштылар. Бу – Казан мөхтәсибәте вәкилләренең беренче сессиясе, республика имам-мөхтәсибләре исә беренче сессияне быелның июнендә Чистайда үтәгән иделәр.
Чара Коръән аятьләрен уку белән башланып китте. Шәһәр дин әһелләрен Татарстан мөфтие Камил хәзрәт Сәмигуллин, МАУ СОК “Трудовые резервы” директоры Руслан Минабетдинов, Татарстан Республикасында РОО “ГТО” рәисе Эдуард Иванов, Казан шәһәре Башкарма комитеты вәкиле Илнур Шакиров һәм массакүләм мәгълүмат чаралары вәкилләре катнашты.
Шәһәр имамнары үзләренең физик әзерлекләрен җиңел атлетика, көчне сынау гимнастикасы һәм сыгылмалык буенча сынады: урта дистанциягә йөгерү (ике километрдан өч километрга кадәр), тартылу, күтәрелү, сикерү, 60 метрга йөгерү.
ГТО нормативларын үтәүдә 22 яшьтән алып 70 яшькә кадәрге Казаннан 65 имам катнашты.
Фоторепортаж: http://dumrt.ru/media/galleries/galleries_1544.html
