2018 елның 1 сентябрендә Татарстан Республикасы мөселманнары Диния нәзарәте һәм Әлмәт мөхтәсибәте башлангычы белән "Нур" исемле яңа татар мәктәбе үз ишекләрен ачачак. Татар телендә белем бирүче урта гомумбелем бирү мәктәбендә балаларга, дөньяви фәннәрдән тыш, факультатив нигездә дин сабаклары да укытылачак. “Нур” мәктәбендә малайлар һәм кызлар аерым белем алачак. Хәзерге вакытта беренче сыйныфка укучылар кабул итү игълан ителде. 2018-2019 уку елында 15 ир бала һәм 15 кыз бала кабул итү планлаштырыла. Мәктәп Әлмәт шәһәре, Волгоградская урамы, 20 нче йорт адресы буенча Р.Фәхретдин исемендәге Әлмәт Ислам мәдрәсәсенең хатын-кызлар бүлеге белән янәшә урнашкан. Белешмәләр өчен телефон: +79272485802.
Исегезгә төшерәбез, агымдагы елның июлендә Татарстан мөфтие Камил хәзрәт Сәмигуллин Әлмәт мөхтәсибәтенә эшлекле сәфәре кысаларында мәктәптәге ремонт эшләре, уку өчен шартлар һәм “Нур” мәктәбенең уку-укыту программалары белән танышты. Бинаны төзекләндерү дәвам итә.
