Бүген 17 август җомга көнне Татарстаннан Мәккәгә хаҗга юнәлгән милләттәшләребез Әл-Хәрам мәчетендә Җомга намазы укыды. Барлык дөнья мөселманнары өчен изге саналган урында Җомга намазын укырга теләүчеләр бихисап. Шуңа күрә иман йортына ике-өч сәгать алдан килү хәерлерәк. Татарстанлылар шулай эшләде дә. Әлеге киңәшне аларга төркем җитәкчеләре бирде. Билгеле булганча, Татарстаннан хаҗга барган мосафирлар 49 кешедән артык булмаган төркемнәргә бүленгән. Һәр төркемнең үз җитәкчесе.
Җомга намазында кардәшләребез вәгазь тыңлады (арада гарәп телен белүче хаҗиларыбыз да бар), фарыз һәм сөннәт намазларын укыды һәм дога кылды. Дога-теләкләрнең берсе – алда торган хаҗ гыйбадәтләрен җиңеллек белән башкарып чыгуны сорау иде.
