Бүген мөфти Камил хәзрәт Сәмигуллин Татарстан Республикасы мөселманнары Диния нәзарәтендә Россиянең Иҗтимагый палатасы әгъзасы, беренче балалар хосписын оештыручы, православие рухание Александр Ткаченко белән очрашты. Камил хәзрәт Сәмигуллин кунакларны Татарстан Республикасы мөселманнары Диния нәзарәте эшчәнлеге белән таныштырды, аерым алганда социаль проектларга тукталды. Мөфтият үз эшчәнлегендә православие һәм яһүд руханилары белән конфессияара диалог алып баруны, шулай ук мөселман өммәте мохитендә башка милли мәдәният вәкилләренә карата татулык хисләре тәрбияләүне стратегик юнәлеш итеп билгеләве турында әйтте. “Россия күп халыклар һәм дини төркемнәр өчен уртак йорт. Без бергә күпгасырлык буыннарның хикмәтен, гаделлеген һәм халыкларның рухи байлыгын туплаган бөек Россия милләтен барлыкка китерәбез”, – дип җиткерде мөфти Камил хәзрәт Сәмигуллин.
Очрашудан соң кунаклар Казан федераль университетының Журналистика һәм медиакоммуникация югары мәктәбе студиясендә хәйриячелек һәм авыру балаларга ярдәм күрсәтү юлларына багышланган семинар эшендә катнашты.
