Татарстанда Өлкәннәр ункөнлеге дәвам итә. Шул уңайдан кичә Чистай шәһәре аксакаллары район мөхтәсибәте исеменнән Чистайдагы «Юлдаш» картлар һәм инвалидлар интернат-йортына барып, анда тәрбияләнүчеләр белән очрашып кайтты. Аксакаллар өлкән буын вәкилләрен узган бәйрәм белән котлап, аларга озын гомер, ныклы сәламәтлек теләде, чәй янына тәм-томнар һәм башка күчтәнәчләр тапшырды. Күчтәнәчләр спонсорлар тарафыннан күрсәтелгән матди ярдәмгә алынды. Очрашуда өлкәннәргә хөрмәт күрсәтүнең мөселманнар өчен изге бурыч икәнлеге искәртелде. Кунаклар өлкәннәрнең хәлләрен белеште, алар белән төрле темаларга аралашты. Әби-бабайлар, үз чиратында, үткән тормышлары турында хатирә уртаклашты.
Хәзерге вакытта «Юлдаш» картлар һәм инвалидлар интернат-йортында барлыгы 140лап кеше тәрбияләнә. Шунысын билгеләп узарга кирәк: аксакалларның картлар йортына тәүге баруы түгел. Киләчәктә аена бер тапкыр биредә тәрбияләнүче мөселманнарга бу дөньяның бәясе, тормыш сынауларын узу һәм башка темаларга вәгазьләр сөйләү, догалар кылып кайту планлаштыра. Кичә җитәкчелек белән бу хакта сөйләшү булды.
Очрашу ахырында әби-бабайлар аксакалларга котлаулары һәм бүләкләре өчен рәхмәт белдерде.
