Бүген Татарстан мөселманнары Диния нәзарәтендә Камил хәзрәт Сәмигуллин Индонезиянең Көнбатыш Ява Губернаторы Ридван Камил җитәкчелегендәге делегация белән очрашты. Чит ил кунаклары 16-21 октябрь көннәрендә Россиянең Мәскәү, Уфа, Казан шәһәрләренә эшлекле сәфәр кылалар. Бүгенге очрашуның төп максаты – Көнбатыш Ява провинциясе һәм Татарстан мөфтияте арасында хезмәттәшлек үсеше мәсьәләләрен өйрәнү.
Кунакларны Татарстан мөфтие Камил хәзрәт Сәмигуллин Галиев мәчетендә каршы алды, ахшам намазын укытты, дога кылды. Эшлекле очрашу Татарстан мөфтияте резиденциясендә дәвам итте. Татарстан мөфтие кунакларга нәзарәт проектлары турында сөйләде һәм киләчәккә ниятләр белән уртаклашты.
Рәсми фикер алышуда сүз дин өлкәсендә хезмәттәшлек алып бару юлларын эзләү, тәҗрибә уртаклашу мөмкинлекләрен карауга багышланды.
Аерым алганда, Камил хәзрәт кунакларны Татарстан мөфтиятенең эшчәнлеге белән таныштырды, ислам диненең үсеше, бай дини мирасыбыз турында сөйләде. Көнбатыш Ява Губернаторы Ридван Камилгә Кәлам Шәрифнең Казан басмасын бүләк итте.
