Бүген Казан аэропортында Татарстан мөфтие Камил хәзрәт Сәмигуллин Дагыстаннан танылган спортчы Абдулрәшид Садулаевны каршы алды. Ирекле стиль буенча көрәшчене каршы алу чарасында ТР Спорт министрының беренче урынбасары Хәлил Шәйхетдинов, Казанның Дагыстан диаспорасы вәкилләре катнашты. Спортчы бүген Ш.Мәрҗанинең тууына 200 ел тулуга багышлап билбау көрәше буенча уздырылачак Халыкара турнир ачылышында катнашачак.
Абдулрашид Садулаев – Олимпия чемпионы, өч тапкыр дөнья чемпионы, ике тапкыр Европа чемпионы, Россиянең танылган спорт мастеры. Абдулрәшид Садулаев 2017 елдан 97 килограммга кадәрге авырлыкта чыгыш ясый.
Турнир бүген көндезге икедә Казанның “Тулпар” спорт комплексында (Равис Гәрәев урамы, 80нче йорт) ачыла. Әлеге чараны ТР мөселманнары Диния нәзарәте, ТР Спорт министрлыгы, Халыкара билбау көрәше федерациясе, Татарстан Билбау көрәше федерациясе оештыра. Ярыш, яшьләрнең рухи-әхлакый һәм физик үсешен тәэмин итү, дөньяның төрле илләреннән килгән катнашучылар арасында дуслык һәм спорт элемтәләрен ныгыту, дөньяның мөселман яшьләре арасында спортчыларны билбау көрәше белән шөгыльләнүгә җәлеп итү максатыннан, үткәрелә.
