“Ни хәлең бар, хәзрәт?” – әнә шундый исемдәге түгәрәк өстәлдә авыл имамнарын борчыган мәсьәләләр хакында сүз барачак. Авыл мәчетләрендә кадрларга кытлык зурмы? Яшьләрнең авыл имамы булырга ашкынмауның сәбәбе нидә? Имамнар һәм җирле хакимиятләрнең мөнәсәбәтләре никадәр тыгыз? Мәчет мәхәлләләре тулы көчкә эшлиме? Чарада шушы һәм башка кискен торган актуаль сорауларга җаваплар китереләчәк. Ачыктан-ачык сөйләшү җәмгыятьне дин әһелләренең проблемаларына йөз белән карату, алар турында ялгыш фикерне үзгәртү, халыкка авыл мәчетләре һәм мәхәлләләре алдында торган кыенлыкларны җиткерү максатында уздырыла.
Куелган сорауларны һәрьяклап, объектив, дөрес һәм тирән итеп яктырту өчен, очрашуда төрле белгечләр катнашачак: мөфтият җитәкчелеге дә, уңышлы эш тәҗрибәсе белән уртаклаша алган яшь авыл имамнарының үзләре дә, аларны белем ягыннан әзерләгән дини уку йортлары вәкилләре дә. Алар арасында – Татарстанның баш казые Җәлил хәзрәт Фазлыев, Татарстан мөфтиенең мәгариф буенча урынбасары, Россия ислам институты һәм Болгар ислам академиясе ректоры Рәфыйк хәзрәт Мөхәммәтшин, мөфтинең мөхтәсибәтләр белән эшләү буенча урынбасары Мансур хәзрәт Җәләлетдинов, “Мөхәммәдия” мәдрәсәсе проректоры Зөлфәт хәзрәт Габдуллин, Ютазы имам-мөхтәсибе Марат хәзрәт Мәрдәншин һ.б.
«Ни хәлең бар, хәзрәт?» түгәрәк өстәле 26 ноябрьдә сәгать 10.00да Казанның Галиев мәчетендә уздырылачак.
ММЧ өчен аккредитация 89172939706 (Резеда Закирова) телефоны буенча.
