Бүген “Зәкят” хәйрия фонды балалар өчен Мәүлид оештырды. Әлеге чара “Туган авылым” күңел ачу комплексында узды, барлыгы илледән артык бала катнашты. Балалар мастер-классларда, анимациядә шөгыльләнделәр һәм аларга тәм-томнар, күчтәнәчләр, әниләргә яулыклар таратылды. Коръән укып дога кылынды. Фонд директоры Булат Мәрданов Мәүлиднең әһәмиятен аңлатты, рухи тәрбия бирүдә Пәйгамбәр салләллаһу галәйһи вә сәллам нәсыйхәтләрен файдалану кирәклеген әйтте. «Гаилә» мәчете имам-хатыйбы Рөстәм хәзрәт Хәйруллин вәгазь сөйләде, дога кылды. Хәзрәт үз чыгышында Пәйгамбәр салләллаһу галәйһи вә сәлләмнең күркәм холкына, аның холкы Коръән булуына тукталды.
Татарстан мөселманнары Диния нәзарәтенең “Зәкят” хәйрия фонды директоры Булат Мәрданов Мәүлид бәйрәмен оештыруда ярдәм күрсәткән спонсорларга рәхмәтен җиткерде. Рөстәм хәзрәт кешеләрдә игелеклелек, мәрхәмәтлелек сыйфатларын зурлый торган мондый чараларның киләчәктә дә узуын теләде, милләтебездә хәйриячелекнең үсешен теләп калды.
Авыру балаларның әти-әниләре мохтаҗ, авыр хәлдә булган балаларга ярдәм кулы сузучыларга рәхмәтен җиткерде. Балаларның йөзләрендә елмаюның сүнмәвен, сүрелмәвен теләделәр.
«Зәкят» хәйрия фонды авыру, мохтаҗ балаларны кайгыртып тора, даими рәвештә очрашулар, мастер-класслар оештыра. ДЦП белән авыручы, аутизм, Даун синдромы белән интегүче балаларга телевидение, социаль челтәрләр аша ярдәм итү юлларын эзлиләр.
