Җөмәдәл-әүвәл аеның 7 нче көнендә Казанның “Тынычлык” мәчетендә Коръән уку бәйгесе үтте. Әлеге ярыш мәхәллә мәчетенә йөрүче балалар арасында узды. Бәйгедә катнашкан яшүсмерләрнең Коръән-Кәримне уку, өйрәнү, ятлау күнекмәләренә Татарстан мөфтие дә үз бәясен бирде.
Бәйгедә Казанның Тынычлык бистәсендә яшәүче һәм Коръән укырга өйрәнүче егермегә якын бала катнашты. Алар барысы да мәртәбәле жюри алдында мөселманнарның Изге Китабын ни дәрәҗәдә белүләрен күрсәтте. Катнашучылар зур критерийлар белән бәяләнсә дә, алар сынатмадылар, сан ягыннан гына түгел, гыйлемлелек дәрәҗәсе буенча да матур нәтиҗә күрсәттеләр.
Төрле номинацияләрдә катнашып, җиңү яулаган дистәгә якын балага истәлекле бүләкләр тапшырылды. Ин шә Аллаһ, киләчәктә татар халкында яңа Коръән-хафизлар буыны тәрбияләнеп чыгуда Тынычлык мәхәлләсе күркәм өлеш кертүчеләрдән булыр!
