Татарстан Республикасы колонияләрендә Ислам нигезләре һәм Коръән уку бәйгеләре башланды. Мисал өчен, узган шимбәдә Россия Җәзаларны үтәтү федераль хезмәтенең Татарстан буенча идарәсенә караган 18 нче төзәтү колониясенең «Нур» мәчетендә дини бәйге узды. Фикъһе нигезләре буенча конкурста утызга якын тоткын катнашты. Моннан тыш, төзәтү колониясендә җәза үтүче 5 мөселман Кәлам Шәриф укуда ярышты. Конкурсантларның белемнәрен ТР мөселманнары Диния нәзарәтенең шәригать мәсьәләләре бүлеге белгече Марсель хәзрәт Мингалиев, шулай ук нәзарәтнең төзәтү колонияләренә беркетелгән имамнары Фәнис хәзрәт Мингәрәев һәм Рафис хәзрәт Сәйфуллин бәяләде. Һәр катнашучыга кызыксындыру бүләкләре тапшырылды. Чара гадәттәгечә чәй өстәле артында һәм күмәк догалар белән тәмамланды.
Тоткыннар арасында Коръән уку буенча чираттагы бәйге бүген Менделеевскиның 10 нчы төзәтү колониясендә урнашкан «Тәүбә» мәчетендә узачак.
ТР мөселманнары Диния нәзарәте, Россия Җәзаларны үтәтү федераль хезмәтенең ТР буенча идарәсе белән берлектә, экстремизм күренешләрен кисәтү максатыннан, Республиканың төзәтү колонияләрендә җәза үтүче мөселманнар белән актив аңлату эшләре алып бара. Бүгенге көндә республиканың барлык колонияләрендә гыйбадәт бүлмәләре яки мәчетләр эшли, аларда махсус әзерлекле имамнар хезмәт куя. Алар тоткыннарны дини яктан тәрбияләү белән шөгыльләнә: вәгазьләр укыйлар, дин белән бәйле сорауларга җавап бирәләр, Коръән укырга өйрәнергә булышалар. Дин әһелләре белән очрашулар атна саен Татарстанның барлык төрмәләрендә уза. Төзәтү колонияләре китапханәләренә «Хозур» нәшрияты чыгарган дини әдәбият тапшырыла. Рамазан аенда ифтарлар уздыру өчен азык-төлек, Корбан бәйрәмендә корбан итләре кертелә.
