Бүген, Рабигыль-әүвәл аеның 24-нче көнендә, Казанда “Рәшидә” Коръән хафизлар әзерләү үзәгендә ислам фәннәре һәм гарәп теле буенча Татарстанның һөнәри мөселман уку йортлары (мәдрәсәләре) арасында нәзарәт тарафыннан оештырылган беренче республика олимпиадасы узды. Ярышларда Яр Чаллы, Әлмәт, Казан, шулай ук Кукмара, Буа, Мамадыш һәм Ютазы районнары шәкертләре катнашты. Бүген олимпиада җиңүчеләре билгеләнде:
"Ислам хокукы":
1 урын – Имамов Шамил ("Мөхәммәдия" мәдрәсәсе).
2 урын – Мөфлихунова Асия (Әлмәт мәдрәсәсе).
3 урын – Хөснетдинов Илшат (Буа мәдрәсәсе).
"Дин нигезләре":
1 урын – Табиев Саян («Мөхәммәдия» мәдрәсәсе).
2 урын – Янтимиров Камил («Фәнис» мәдрәсәсе).
3 урын – Шәфигуллин Равил (Кукмара мәдрәсәсе).
"Гарәп теле":
1 урын – Хәйруллин Самат (“Мөхәммәдия” мәдрәсәсе).
2 урын – Шәрипов Әхмәд (Әлмәт мәдрәсәсе).
3 урын – Бобоева Гүзәлхон (“Фәнис” мәдрәсәсе).
Татарстан мөселманнары Диния нәзарәте беренче урын алучыларга айпадлар, икенчегә – ноутбуклар, өченчегә – мобиль телефоннар тапшырды. Шамил Имамов исә Ислам фәннәре һәм гарәп теле буенча республика олимпиадасының абсолют җиңүчесе булды. Аңа хаҗга юллама тапшырылды.
Шамил Имамов – Ульян өлкәсе Мәләкәс (Димитровград) шәһәреннән килгән 22 яшьлек татар егете, ул мәдрәсәдә өченче курста белем ала. Яшьтәшләреннән тырыш булуы, укуга җитди каравы белән аерылып тора. Ул олимпиада сорауларына җавап биреп, иң күп балл җыйды. Соңыннан өч номинациядә җиңүчеләрне Коръән укытып белемнәрен тикшерделәр. Шамил кыйраәт, тәҗвид, мәкам һәм үз-үзен тоту буенча яхшы нәтиҗә күрсәтте һәм хаҗга юлламага лаек булды.
Исегезгә төшерәбез, иң яхшы нәтиҗә күрсәтүчеләр Татарстан данын Ислам фәннәре һәм гарәп теле буенча XII Бөтенроссия олимпиадасында яклаячак, ул шулай ук Казанда, декабрь башында узачак. Анда Татарстан, Башкортстан, Дагыстан, Чечня, Ингушетия, Кабарда-Балкар, Мордовия, Карачай-Чиркәс, Мәскәү, Түбән Новгород һәм Россиянең башка төбәкләренең дини уку йортлары студентлары катнашуы көтелә. Олимпиаданың республика туры Татарстаннан иң сәләтле шәкертләрне ачыклау һәм аларны Бөтенроссия этабына әзерләү максатыннан беренче тапкыр уздырылды.
