Бүген, Рабигыль-ахыр аеның 13-нче көнендә (10-нчы декабрьдә), ТР мөселманнары Диния нәзарәтендә Хеврон провинциясе губернаторы Җибрин Ильяс Абед Әл-Бакри җитәкчелегендәге Фәлистыйн делегациясе булды. Делегация составына Фәлистыйннының инвестиция компанияләре һәм җитештерү предприятиеләре вәкилләре керде. Чит ил кунакларын Татарстан мөфтие Камил хәзрәт Сәмигуллин каршы алды.
Шуны да билгеләп үтәргә кирәк, делегация Казанга рәсми визит белән килде. Алар Татарстанның икътисадый потенциалы белән танышты һәм республиканың төрле ведомстволарында эшлекле очрашулар уздырды. Моннан тыш, кичә алар Россия ислам институтында булды.
Бүгенге очрашу барышында мөфти Камил хәзрәт Сәмигуллин кунакларга Татарстанда Ислам үсеше тарихы, татар халкының бай дини мирасы һәм рухи мәдәниятенең үзенчәлекләре турында сөйләде. Шулай ук ул аларны ТР мөселманнары Диния нәзарәтенең күпкырлы эшчәнлеге, шул исәптән ислам мәгарифе, Коръән тәрҗемәләре әзерләү, социаль һәм нәшрият өлкәләре белән таныштырды.
Хеврон провинциясе губернаторы Җибрин Ильяс Абед Әл-Бакри Татарстан мөфтиенә җылы каршы алганнары өчен рәхмәтен белдерде, Россиядә Ислам үсешенең уңай тенденциясен ассызыклады. Моннан тыш, ул Татарстанның бердәм территориядә төрле халыклар һәм дин вәкилләренең дустанә яшәү үрнәге булып хезмәт итүен билгеләп үтте.
Губернатор ярдәмчесе Рәфикъ Җабари күп гасырлар дәвамында ислам динен тотучы татар халкы тарихына, шулай ук Борынгы Болгарның мәдәни мирасына, төзекләндерү эшләренә соклануын белдерде: «Мин Америкада яшәдем, күп кенә илләрдә булдым, ләкин Болгарда күргән нәрсәләрне мин беркайда да күрмәдем. Элегрәк монда килмәвемә бик үкенәм", – диде ул.
Камил хәзрәт, үз чиратында, татар дин әһелләре арасында да Фәлистыйн ислам вузларында белем алучылар аз булмавын билгеләп үтте.
Делегация вәкилләре бу сәфәрнең хезмәттәшлек өчен нигез булачагына ышаныч белдерделәр, шулай ук Татарстан мөфтиен җавап визиты белән Фәлистыйнга чакырдылар.
