Камил хәзрәт Сәмигуллин: “Олуглап әйткән сүзләребез Мөхәммәтгариф мулла улы Тукай рухына дога булып барып ирешсен”

26 апрель 2016 ел 16:04

“Хозур” нәшрият йорты «…Мин кулыма китап алам» дип аталган китап нәшер итте. Бу җыентыкта бөек шагыйребез Габдулла Тукайның ислам диненә кагылышлы шигырьләре тәкъдим ителә.

Шагыйребезнең Исламга һәм Коръәнгә карата булган ихтирамы һәм мәхәббәте китапта китерелгән «Таян Аллага», «Китап» шигырьләрендә чагыла. «Мигъраҗ», «Кадер кич», «Бәйрәм вә сабыйлык вакыты» шигырьләре исә дини вакыйгаларга һәм бәйрәмнәргә багышланган.

Китап Татарстан мөфтие Камил хәзрәт Сәмигуллинның кереш сүзе белән ачыла. Анда түбәндәге сүзләр язылган:

“Бисмилләһир-рахмәнир-рахим!

Әссәләәмү гәләйкүм үә рахмәтүллаһи үә бәракәәтүһ!

Ел саен халкыбыз апрель аенда татарларның бөек шагыйре Габдулла Тукайны зурлап искә ала. Аның рухи мирасын өйрәнүгә багышланган күп чаралар уздырыла. Дин әһелләре, мөгаллимнәр һәм мәдрәсәләрдә гыйлем алучы шәкертләр дә әлеге күркәм вакыйгалардан читтә калмый.

Еш кына бу чараларда шагыйрьнең «...тулган иман берлә Коръән садремә!» − дип язган сүзләре яңгыраш таба. Тукай иҗатын, тормышын өйрәнгән галимнәребез аның Коръән өйрәткәннәрне шигъри юллар белән җиткергәне хакында сөйлиләр. Болардан тыш шагыйрьнең замандашы Шәһеретдин Шәрәфнең (1877-1938) истәлегенә аерым бер игътибар юнәлтелә. Әлеге истәлектән күренгәнчә, Тукай үзенең дингә карашын бик ачык белдергән. «Дөньяда динсез бер милләт тә юк, бөтен милләтләр динле булганда, без генә динсез булып кала алмамыз. Халкымызда миллиятьләре сакланган мөддәттә, диннәре дә сакланачагына ышанам. Миллиятьләрен яхшы саклый алуларында гына азрак шөбһәм бар. Мин һәрвакыт дин берлә миллиятьнең һәр икәвесенә тигез әһәмият бирү тарафындамын», − дигән ул замандашына.

Быел бөек шагыйрьнең тууына 130 ел тулган көннәрдә  узган ел нәшер ителгән «...Мин кулыма Китап алам» дип исемләнгән китапны янә бастырырга ният иттек. Бу китапка Тукайның дини темага язылган төрле шигырьләре, аның иҗатын өйрәнгән билгеле татар галимнәренең мәкаләләре тупланган.

Тукайның динебезне зурлаган, күңелләребезне нечкәрткән шигъри юллары дини һәм милли хисләрне аңларга, кадерен белергә ярдәм итсен.

Олуглап әйткән сүзләребез исә Тукай рухына дога булып барып ирешсен. Раббыбыз Мөхәммәтгариф мулла улы Габдулла рухын шат кылсын!

Үзәкләшкән дини оешма –

Татарстан мөселманнары Диния нәзарәте рәисе,

мөфти Камил хәзрәт Сәмигуллин

Әлеге китапны http://huzurshop.ru/ сайтыннан яки Казан шәһәре, Г. Тукай урамы, 3 нче йорт адресы буенча урнашкан кибеттән алырга мөмкин. Белешмәләр өчен телефон: +7 (843) 202-07-74.

Дин әһеле
1992 -1998 елларда
Дин әһеле
1998 - 2011 елларда
Дин әһеле
2011 – 2013 елларда
Дин әһеле
2013 елның 17 апрелендә сайланды

Намаз вакытлары

Иртәнге намаз
Кояш чыга
Өйлә намазы
Икенде намазы
Ахшам намазы
Ястү намазы
Яңалыклар архивы
Tatarstan.Net - все сайты Татарстана