string(36) "http://dumrt.ru/news/news_18565.html"
13.09.2017 09:28

12 сентябрьдә “Экстремизмга – юк!” айлыгы кысаларында Татарстан Республикасы мөселманнары Диния нәзарәтенең яшьләр эшләре бүлеге тарафыннан мөселман яшьләре һәм православие яшьләре арасында дусларча волейбол матчы уздырылды. Традициягә кергән әлеге спорт ярышы быел Казан шәһәренең Совет районы мөхтәсибәте ярдәме белән 108 нче мәктәптә оештырылды. Яшьләр махсус залда командаларны берләштереп үзара көч сынашты. Уен уртак нәтиҗә – дуслыкның җиңүе белән тәмамланды. Дусларча матч узганнан соң “Котдус” мәчете ашханәсендә чәй табыны янында гамьле әңгәмә дәвам итте. Нәтиҗәдә, “Дуслык” һәм “Дружба” дип аталган командалар волейбол ярышларын ешрак уздырырга сүз куешты.

Исегезгә төшерәбез, 8  сентябрьдән Татарстанда “Экстремизмга – юк!” айлыгы башланды. Акция республикада милләтләр һәм конфессияләр арасында татулыкны ныгыту, экстремизм һәм террорчылыкны кисәтү, социаль, этник һәм конфессиональ нигездә чыгарга мөмкин булган конфликтларны кисәтү, иҗтимагый фикер формалаштыру максатыннан оештырыла.