22 октябрь көнне Алабуганың “Шатлык” мәчетендә Коръән укучылар һәм азан әйтүчеләр конкурсы узды. Әлеге чара ун ел рәттән оештырыла. Быелгы конкурсның үзенчәлеге – олыларның да катнашуы. Иң өлкән яшьтәге катнашучыга 80 яшь булды, иң кечкенәсенә – 3 яшь.
Коръән укучылар конкурсында катнашучыларны жюри әгъзалары тәҗвидне белүгә (Коръән хәрефләрен дөрес уку), мәкам (матур яңгыраш), катнашучының тышкы кыяфәтенә һәм үз-үзен тотышына карап бәяләде. Малайлар арасында (17 яшькә чаклы) – Ясин Хәйдәров, ир-егетләр арасында (18-60 яшьлекләр) – Нәбиуллин Фәнзил, кызлар арасында (17 яшькә кадәр) – Хәйдәрова Әзизә, хатын-кызлар арасында (18-60 яшьлекләр) – Вәлиева Айсылу җиңүче дип табылды һәм кыйбатлы бүләкләргә ия булдылар.
