Татарстан Республикасы мөселманнары Диния нәзарәте тарафыннан игълан ителгән татар дин галиме, күренекле җәмәгать эшлеклесе, педагог Галимҗан Баруди елы кысаларында, 22 ноябрьдә Каюм Насыйри музеенда Галимҗан Барудига багышлап төшерелгән документаль фильмны күрсәтәчәкләр. Әлеге чарада культурологияне өйрәнүче галимнәр, фәлсәфәчеләр, дин һәм җәмәгать эшлеклеләре катнашачак.
Шулай ук Диния нәзарәте белән бергәлектә “Хозур” нәшрият йорты нәшер иткән китаплардан Галимҗан Баруди хезмәтләре күргәзмәсе оештырылачак. Галимнең 22 хезмәте, шулар арасында “Мәдхәл-гарәбия” гарәп теле дәреслеге, дин нигезләре һәм әдәп буенча “Сәвадхан” дәреслеге, намаз буенча әсбап “Әзкяр әс-салават”, пәйгамбәрләр буенча “Тарихе әнбия” трактаты тәкъдим ителәчәк.
Программада мәдәни өлештә традицион рухи җырларны башкаручы Динар Шәймәрданов мөнәҗәтләр әйтәчәк.
Үткәрелү урыны: Казан шәһәре, Париж Коммунасы урамы, 35 нче йорт.
Башлана: 13.00.
