Бүген Казан шәһәренең Галиев мәчетендә өйлә намазында Төркиянең танылган Коръән хафизы Исхак Даныш катнашты. Мәртәбәле кунак Татарстан Республикасы мөселманнарының Диния нәзарәтенең чакыруы буенча Мәүлид көннәрен Казанда үткәрергә махсус килә.
Бүген Исхак Даныш Галиев мәчетенең мәхәллә халкын намазга чакырып азан әйтте, намаздан соң Коръән сүрәләре укыды, җәмәгать белән салаватлар әйтте. Мәүлид ән-Нәби кичәсен кунак Мирный поселогының Тынычлык мәчетендә каршылар дип көтелә. Иртәгә исә иң зур Мәүлид бәйрәмендә Болгарда катнашачак.
Исегезгә төшерәбез, Төркиянең билгеле дин әһеле кичә Казанның Апанай мәчетендә узган Мәүлид кичәсендә катнашып, Коръән, зикер һәм салаватлар укыган иде.
