Бүген Чаллы шәһәренең “Туфан” мәчетендә мөхтәсибәтнең Аксакаллар шурасы шәһәр имамнары катнашында Пәйгамбәребез Мөхәммәд салләллаһу галәйһи вә сәлләмнең туган көненә багышлап мәҗлес үткәрде. Мәҗлестә чыгыш ясап, Чаллы шәһәре имам-мөхтәсибе Әлфәс хәзрәт Гайфуллин Пәйгамбәребез Мөхәммәд салләллаһу галәйһи вә сәлләмнең тормыш юлын, күркәм әхлагын халыкка аңлату өчен Мәүлид аен нәтиҗәлерәк файдаланырга чакырды. Ул шулай ук җыелучыларны кичә Болгарда узган Мәүлид кичәсе белән таныштырды.
Аксакаллар сөйләшү барышында алдагы ел өчен эш планы хакында фикер алыштылар. Шулай ук 17 декабрьдә шәһәр күләмендә уздырылачак Мәүлид кичәсенә әзерлек, мәктәпләрдә һәм балалар бакчаларында хәләл туклануга күчүгә булышлык күрсәтү һ.б. мәсьәләләр буенча сөйләшү булды.
Өйлә намазыннан соң җыелышта катнашучылар өчен аш мәҗлесе оештырылды.
