2012 елның 31 гыйнварында Мөфти Илдус хәзрәт Фәйзов Иран Ислам Республикасының Казандагы Генераль консулы Рәсүл Шаян белән очрашты. Очрашу барышында дөньядагы ислам дине торышы һәм киләчәктә үзара хезмәттәшлек турында фикер алыштылар. Шулай ук Генераль консул “Коръән Елы”нда катнашырга теләк белдерде: “Сәнгать көзгесендә Иран” шәмаилләр күргәзмәсен әлеге чаралар рәтенә кертергә тәкъдим ясады.
Исегезгә төшерәбез, Президентыбыз Р.Н.Миңнеханов тарафыннан 2012 ел тарих һәм мәдәният елы дип игълан ителде, шуның кысаларында ТҖ МДН агымдагы елны Коръән Елы буларак билгеләп үтүне кирәк дип тапты. Ел дәвамында Изге Коръәнгә багышланган күпләгән чаралар үткәрелер дип көтелә.
