“Россия – ислам дөньясы: KazanForum” Халыкара икътисади форумы мәйданчыгында Татарстан мөфтиятенең “Хәләл” стандарты буенча комитеты FAMBRAS HALAL оешмасы белән меморандум имзалады. Килешүне имзалауда “Хәләл” стандарты буенча Комитет җитәкчесе Габбас хәзрәт Шляпошников һәм FAMBRAS HALAL компаниясе башкарма директоры Бассим Али әл-Загхби катнашты.
Бассим Али әл-Загхби ТР мөселманнары Диния нәзарәтенең “Хәләл» стандарты комитетына хәләл индустрияне үстерү һәм халыкара сертификацияләү эшендә ярдәм итәргә әзерлеген белдерде.
FAMBRAS HALAL Латин Америкасында хәләл продуктларны һәм хезмәтләрне сертификацияләү буенча иң зур оешма һәм Бразилиядә хәләл системаны кертүдә беренче башлап җибәрүче булып тора. FAMBRAS HALAL штаб-фатиры Сан-Паулуда, Бразилиядә урнашкан, Колумбия һәм Парагвайда да филиаллары бар. Компания продукцияне дөньяның 185 иленә, шул исәптән Россия Федерациясенә чыгара.
