Аллаһ Сүбхәнәһү вә Тәгаләгә мактауларыбыз булса иде!
Әссәламү галәйкүм вә рахмәтуллахи вә бәрәкатүһ!
Татарстан Җөмһүрияте мөселманнары Диния нәзарәте һәм шәхсән үз исемемнән барлык мәктәп укучыларын, студентларны, ата-аналарны, укытучыларны, гомумән, һәркемне әлеге олуг бәйрәм – Гыйлем көне белән тәбрик итәм.
1 сентябрь – белем туплаудагы яңа этап. Әлеге көн, мәктәп һәм башка уку йортларында белем алучылар өчен генә түгел, яңа буын тәрбиясен кайгырткан һәркайсыбыз өчен дә мөһим вакыйга.
XXI гасыр – җәмгыятебезнең гаять тә катлаулы чоры. Шуңа да бүгенге көндә бары тирән гыйлемгә ия булганнар гына тормышта үз юлларын таба ала, бары гыйлемле кешеләр генә уңышка ирешәләр, бары гыйлемле яшьләргә генә милләтнең, мөселман өммәтенең киләчәген ышанып тапшыра алабыз.
Татар халкында юкка гына “Гыйлемне бишектән ләхеткәчә алыгыз” дип әйтмиләр. Мәгариф системасы халкыбыз, милләтебез, динебез тарихында элек-электән әһәмиятле өлкәләрнең берсе булып килде. Халкыбызның йөзен һәрвакытта та гыйлемле зыялылар билгеләде. Шул исәптән, дини һәм дөньяви гыйлемне бергә үреп алып бардылар. Мөхәммәд пәйгамбәребез (сгв) дә “Гыйлем алу мөэмин мөселманнар өчен фарыз гамәл” дигән.
Әлеге бәйрәм, әйтеп үткәнемчә, аерым бер катлам кешеләре өчен генә түгел, тулаем җәмгыятебезнең бәйрәме. Шуңа да милләтебезнең, динебезнең, халкыбызның йөзе, киләчәге, тарихы бары гыйлемле кешеләрдән генә тора. Әйдәгез, бергәләшеп үзебезнең киләчәк тарихыбызны язуга өлеш кертик, гыйлемле, инсафлы кавем тәрбиялик. Милләтебезнең тарихын югары гыйлемгә ия булган зыялы аксакаллар билгеләсә, киләчәгебез үз эшләренең белгечләре булган гыйлемле яңа буын көтә.
Хәерле елларда һәркайсыбызга да файдалы гыйлемнәр насыйп булсын!
Үзәкләшкән дини оешма –
ТР мөселманнары Диния нәзарәте рәисе, Мөфти Илдус хәзрәт Фәйзов
