Татарстан мәчетләрендә балалар өчен дин сабаклары башланып китте. Дәресләр 763 мәчет каршындагы бушлай курслар кысаларында уздырыла. Курсларга 20 меңгә якын кеше йөри. Шуларның 2 меңе - 6-18 яшьтәге яшьтәге балалар. Сабыйларга гарәп графикасы һәм ислам дине нигезләре, шул исәптән тәрбия-әхлак, дини гыйбадәт тәртипләре, Пәйгамбәребез тормышыннан мисаллар китерелеп укытыла. Дәресләр шимбә-якшәмбе көннәрендә уза. Мисал өчен, узган атнаның ял көннәрендә район имам-мөхтәсибләре катнашында Балык бистәсе һәм Мамадышның Үзәк мәчетләрендә балалар өчен шундый дәресләрне ачып җибәрү тантанасы булды. Балаларга кирәкле әдәбият, уку әсбаплары тапшырылды.
Балаларга сабак бирүгә Россия ислам институты һәм Диния Нәзарәтенең “Яшьләр бистәсе” уртак проекты кысаларында институтның 13 шәкерте дә кушылды. Алар Татарстанның төрле мөхтәсибәтләренә чыгып балаларга дәрес бирәләр, төрле кызыклы чаралар, уеннар уздыралар.
