Бөгелмәнең Үзәк мәчетендә шәһәр һәм район мәктәпләре укучылары арасында ислам нигезләре буенча викторина уздырылды. Бәйгедә катнашучыларның саны 100дән артып китте. Татар Димескәе, Карабаш, Кодаш, Таллы Бүләк, Кызыл Чишмә авыллары балалары аеруча активлык күрсәтте.
Викторина язма тест рәвешендә үткәрелде. Барлыгы 100 сораудан торган төрле авырлыктагы 3 вариант әзерләнгән иде. Бер сәгать дәвамында балалар язма тест сорауларына бернинди ярдәмсез һәм әдәбият кулланмыйча җавап язды.
Бөгелмә имам-мөхтәсибе Рамил хәзрәт Хөснетдинов сүзләренә караганда, районда шундый киңкүләмле бәйге беренче тапкыр оештырылды. Әлеге чара балаларның дини белемнәр алуга теләген арттырды, диде ул.
Катнашучыларны Татарстанның Көньяк-Көнчыгыш төбәге казые Марат хәзрәт Мәрданшин рәислегендә Лениногорск Үзәк мәчете имамы Абдуразак хәзрәт Имранов һәм Бөгелмәнең Үзәк мәчете имамы Ринат хәзрәт Галиев бәяләде.
Викторинада җиңүчеләргә кыйммәтле бүләкләр тапшырылды: ноутбук, планшет һәм планшет. Номинантлар смарт-сәгать, үтүк, шәмаил белән бүләкләнде. Барлык конкурсантларга катнашучы сертификаты табылды.
Бөгелмә мөхтәсибәте барлык иганәчеләргә һәм әлеге чарада катнашучыларга рәхмәтен җиткерә.
