Бүген Иваново өлкәсенә эшлекле сәфәре кысаларында Татарстан мөфтие Камил хәзрәт Сәмигуллин Иваново өлкәсе мөселманнары Диния нәзарәте рәисе Фәрит хәзрәт Ляпин һәм Иваново өлкәсе Хөкүмәте чакыруы буенча Россия халык хуҗалыгы һәм дәүләт хезмәте академиясенең Иваново филиалы студентлары белән очрашты. Ачык дәрестә ул Татарстанның, ТР мөселманнары Диния нәзарәтенең конфессияара элемтәләр урнаштырудагы тәҗрибәсе, шулай ук мөфтият белән митрополиянең республика халыклары арасында дустанә мөнәсәбәтләр булдыру һәм аларны саклауга юнәлтелгән үзара багланышлары турында сөйләде.
Конфессияләр арасында элемтәләр үсеше Татарстан Республикасы мөселманнары Диния нәзарәтенең юнәлешләренең берсе санала. Барлык диннәргә дә уңай мөнәсәбәттә булган шәхес тәрбияләү юнәлешендә актив эшчәнлек аеруча мөселман яшьләре арасында алып барыла. Төрле конфессия вәкилләре арасында спорт ярышлары һәм турнирлар үткәрү “дини түземсезлек” белән көрәштә нәтиҗәле булуын күрсәтте. Мәчет мөнбәрләреннән толерантлык һәм күрше милләтләргә хөрмәт белән карау турында әйтелгән вәгазьләр, түгәрәк өстәлләр, бәхәс клублары һәм әңгәмәләрнең дә әһәмияте әйтеп бетергесез. Гомумән, Диния Нәзарәтенең бу өлкәдәге тәҗрибәсе бөтен Россия күләмендә, хәтта чит илләрдә дә кызыксыну уятты. Татарстан мөфтие Камил хәзрәт Сәмигуллин 2017 елда әлеге тема буенча эксперт буларак күп кенә форум һәм конференцияләрдә чыгыш ясады. Ауропа Советы, Берләшкән милләтләр оешмасы, “Россия – ислам дөньясы” Стратегик караш төркеме һәм башка шундый абруйлы мәйданчыкларда Татарстан мөфтие Камил хәзрәт Сәмигуллин әлеге темалар буенча эксперт сыйфатында җәлеп ителде.
