Кичә, Рамазан аеның 18нче көнендә (28нче мартта), Татарстан мөселманнары башлыгы Камил хәзрәт Сәмигуллин эш сәфәре белән Тукай мөхтәсибәтендә булды, биредә ул район башлыгы Фаил Камаев исеменнән оештырылган ифтарда катнашты. Әлеге чарага 130лап кеше – имамнар һәм авыл мәчетләре активистлары җыелды.
Сәфәр барышында Камил хәзрәт Сәмигуллин район башлыгы Фаил Мисбах улы белән очрашу үткәрде. Очрашуда сүз төбәктәге дини вәзгыять, җирле мәхәлләләр эшчәнлеге, шулай ук якын арада планлаштырылган чаралар хакында барды.
Аннары Камил хәзрәт дин кардәшләр белән очрашу үткәрде, Рамазан аеның һәм ураза тотуның фазыйләтләре хакында вәгазь сөйләде, изге гамәлләрнең кабул ителүен, гөнаһларның ярлыкануын сорап дога кылды.
Ифтар вакытында Коръән-хафиз гаиләләренә истәлекле бүләкләр тапшырылды.
Шунысын билгеләп узарга кирәк, Рамазан ае башланганнан алып Камил хәзрәт Казан, Түбән Кама, Аксубай, Теләче, Лаеш һәм Буа районы мөселманнары белән очрашырга өлгерде.
