Чистай мөхтәсибәтендә имамнар җыелышы булды. Дин әһелләре «Мәктәпкә җыенырга ярдәм ит!» акциясен үткәрү, балалар йортында тәрбияләнүче нарасыйлар белән очрашу оештыру, Корбан гаетенә әзерлек һәм башка актуаль мәсьәләләр турында фикер алышты. Район мөхтәсибе Мөхәммәд хәзрәт Кыямов имамнарны республика мәчетләрендә җомга вәгазьләрен татар телендә укырга дигән карар белән дә таныштырды.
Очрашу барышында шулай ук Чистай мөхтәсибәте каршында эшләп килүче Акскаллар шурасының “Ак калфак” иҗтимагый оешмасы һәм Бөтендөнья татар конгрессының Чистайдагы бүлекчәсе белән хезмәттәшлек итү юллары да барланды.
