Кичә Баулы мөхтәсибәтенең "Гали" мәчетендә имамнар җыелышы узды. Җыелыш район имам-мөхтәсибе Әнвәр хәзрәт Хәмитов җитәкчелегендә барды. Чарага шулай ук көньяк-көнчыгыш төбәге казые, Ютазы районы имам-мөхтәсибе Марат хәзрәт Мәрданшин да чакырулы иде.
Баулы мөхтәсибәте имамнары 2017 елга планнарын "Галимҗан Баруди елы" кысаларында оештырылачак чаралар исемлеген барлады. Ел дәвамында активлык күрсәткән имамнарга казыят исеменнән рәхмәт хатлары да тапшырылды. Җыелыш кысаларында Аксакаллар шурасы рәисе сайланды. Әлеге җаваплы вазыйфага Флюр хәзрәт Габидуллин сайланды.
