Бүген Уррусының “Фәнис” мәдрәсәсе үзенең 10-еллыгын билгеләп үтә. Бу уңайдан Ютазы мөхтәсибәтенә республиканың барлык мөселман уку йортлары җитәкчеләре, көньяк-көнчыгыш төбәге имамнары һәм мөхтәсибләре, район администрациясе вәкилләре һәм дини уку йорты шәкертләре җыелган. Әлеге чарада мөфтинең урынбасарлары Мансур хәзрәт Җәләлетдин белән Рәфыйк Мөхәмәтшин да катнаша.
Бәйрәм чаралары Татарстан мәдрәсәләрендә белем алучы шәкертләрнең гарәп теле һәм фикъһтнан белемнәрен тикшерүдән башланып китте.
Мәгълүм булганча, «Фәнис» мәдрәсәсе Ингушетия Республикасында һәлак булган полиция полковнигы Фәнис Кәримовның исемен йөртә. Бүгенге чарага аның якыннары чакырылган иде. Дин әһелләре Фәнис Кәримовның туганнары белән бергә аның каберен зиярат итте, Коръән укыды һәм дога кылды.
Төп чара көндезге сәгать 10да «Фәнис» мәдрәсәсе бинасында Коръән аятьләрен уку белән башланып китте. Җыелган кунаклар мәдрәсәнең ислам кыйммәтләрен таратуда һәм ТР ислам мәгарифе системасында тоткан урны хакында фикер алышты, мәдрәсәгә бәйле хәтирәләре белән бүлеште. Форсаттан файдаланып, быел мәдрәсәне тәмамлаучы шәкертләр һәм олимпиада җиңүчеләре Рәфыйк Мөхәмәтшин кулыннан дипломнар, рәхмә хатлары һәм кыйммәтле бүләкләр алды.
Чараны дәвам итеп мәдрәсә җитәкчеләренең җыелышын да үткәрелде. Алар шәкертләрне эш белән тәэмин итү һәм аттестация нәтиҗәләре хакында сөйләште, киләчәккә планнарын барлады.
