Бүген Татарстан мөфтие Камил хәзрәт Сәмигуллин 18нче төзәтү колониясендә булды. Тоткыннар белән шулай ук мөфтинең социаль мәсьәләләр буенча киңәшчесе Илдар хәзрәт Баязитов, колония һәм Җәзаларны үтәү буенча федераль хезмәтнең ТРдагы идарәсе җитәкчелеге очрашты.
Очрашу нәзарәт вәкилләре алып килгән күчтәнәчләр белән сыйланган рәвештә, чәй табыны артында үтте. Камил хәзрәт иректән мәхрүм ителгәннәргә әдәп-әхлак, динебез кыйммәтләре, якынлашып килүче Корбан гаетенең тарихы һәм республикада бу уңайдан нинди чаралар үткәреләсе хакында сөйләде. Мөфти хәзрәтләре аларны дәүләт кануннарын һәм динебез кушканнарны тиешле дәрәҗәдә үтәргә чакырды. Корбан ите белән тоткыннар да тәэмин ителәчәген дә хәбәр итте.
Очрашу барышында тоткыннар кызыксындырган сорауларын бирә алды. Чара күмәк намаз белән тәмамланды.
