Бүген Арча районының Иске Муй авылында төзекләндерүдән соң "Ислам нуры" мәчете ачылды. Тантаналы ачылышта нәзарәтнең дәгъват бүлеге җитәкчесе Нияз хәзрәт Сабиров, Арча районы имам-мөхтәсибе Раил хәзрәт Гыйләҗев, район башлыгы Илшат Нуриев һәм "Таттелеком" оешмасы вәкилләре катнашты. Нәкъ менә әлеге оешманың генераль директоры Лотфулла Шәфигуллин мәчетне төзекләндерү эшләренә саллы өлешен кертә.
Тарихка күз салсак, Иске Муйна авылының бу мәчете 1913 елда төзелә, ләкин совет чорында аның бинасында башка оешмалар да урнашып тора. Хәзер Аллаһ йорты янәдән үз ишекләрен ачты. Диния нәзарәте вәкиле Нияз хәзрәт Сабиров әлеге вакыйганың Гарәфәт көненә туры килүен аеруча сөенечле булуын билгеләп үтте һәм мәчетнең җирле халыкның рухи үсешенә ярдәм күрсәтүенә өметен белдерде. Ул шулау ук мәчет төзелешенә өлеш кертүчеләргә нәзарәтнең бүләкләрен дә тапшырды, мөфти Камил хәзрәт Сәмигуллинның сәламнәрен ирештерде.
