Бүген Балтач Үзәк мәчетендә һәр айның пәнҗешәмбесендә уза торган чираттагы имамнар җыелышы булды. Әлеге җыелышта Татарстан мөфтиенең территорияләр (мөхтәсибәтләр) белән эшләү буенча урынбасары Мансур хәзрәт Җәләлетдин, Татарстанның баш казые Җәлил хәзрәт Фазлыев, Балтач районы хакимияте урынбасары Илһам Гайнетдинов, Балтач районы прокуроры Айрат Низамиев һәм Балтач Эчке эшләр идарәсе начальнигы Илдар Усманов катнашты.
Әлеге чарада Мансур хәзрәт Җәләлетдин бердәмлекнең әһәмияте турында сөйләде. Җәлил хәзрәт Фазлыев быелгы хаҗга нәтиҗәләр ясады, гошер сәдакалары бирүнең әһәмияте турында сөйләде. Кемнәрдә җыелмаган – җыеп бетерергә кушылды. Эшне яхшы оештыручыларга рәхмәтләр әйтелде. Балтач районы прокуроры һәм Балтач Эчке эшләр идарәсе начальнигы Диния нәзарәтенең Уставы буенча эшләргә киңәш бирделәр. Мансур хәзрәт районның 41 имамына шәһадәтнамәләр тапшырды. Чара вәгазь белән чәй табынында төгәлләнде.
