Иртәгә Татарстан мөфтие Камил хәзрәт Сәмигуллин Согуд Гарәбстаны Короле Сәлман бен Габдел Азиз Әл Сауд белән очрашачак. Очрашу Мәскәүдә тар составта монархның Россиягә визиты кысаларында Согуд Гарәбстаны инициативасы белән уза. Әлеге чарада унга якын Россия мөселман дин эшлеклеләре катнашуы көтелә, шул исәптән Татарстан мөфтие Камил Сәмигуллин, Россиянең Үзәк мөселманнар Диния нәзарәте рәисе Тәлгать Таҗетдин, Россия Мөфтиләр шурасы рәисе Равил Гайнетдин, Карачаево-Черкесия Республикасы мөфтие Исмәгыйль Бердиев һәм башкалар.
Сөйләшүләрдә экстремизм һәм радикаль ислам мәсьәләләренә кагылышлы фикер алышулар көтелә. “Радикаль ислам һәм экстремизм мәсьәләләре чынлап торып күтәрелер, чөнки бу безнең өчен авыр әйбер. Без соңгы вакытта Согуд Гарәбстанының әлеге мәсьәләләргә башкача карый башлавын күрәбез, киләчәктә безнең фикер-карашларыбыз туры килер дип уйлыйм. Бу нәкъ менә дин һәм илаһият өлкәләренә кагыла”, – дип ассызыклады ТАССка Камил хәзрәт Сәмигуллин.
Исегезгә төшерәбез, Согуд Гарәбстаны Короле Сәлман бен Габдел Азиз Әл Сауд Мәскәүгә дәүләт визиты белән 4 октябрьдә килде. Кичә Кремльдә Россия Президенты Владимир Путинның Король белән очрашуы узды. Соңрак Россия-Согуд Гарәбстаны сөйләшүләре киңәйтелгән составта дәвам итте. Король Мәскәүдә 7 октябрьгә кадәр булырга уйлый.
