19 октябрьдә Буа районының “Госман” мәчетендә Коръән хәтем кылу башланды.
Һәр пәнҗешәмбе Буа мөселманнары гарәп телендә Коръәннән бер җүз укыячак. Бер җүз ул – Коръәннең якынча утыздан бер өлешен тәшкил итә.
Хәтем кылуны Буа районы имам-мөхтәсибе Илмир хәзрәт Хәсәнов оештыра һәм алып бара.
Мөхтәсибәт барлык теләүчеләрне мәчеткә килергә һәм Коръән укуны тыңларга чакыра.
Мөселманнарның изге китабын тулысы белән укып чыкканнан соң илдә тынычлык һәм иминлек өчен, шулай ук туган республикабыз һәм районыбызның чәчәк атуын, үсүен сорап дога кылачаклар.
