Татарстан Республикасы мөселманнары Диния нәзарәте тарафыннан тормышка ашырыла торган “Хузур ТВ” мөселман телевидениесе проектын эшләтеп җибәрү эшләре ахырына җитеп килә. Декабрь аенда телевидение студиясе интернет челтәрендә тәүлек дәвамында эшләүгә күчәчәк. Бу хакта бүген Татарстан мөфтие Камил хәзрәт Сәмигуллин һәм аның мәгълүмати сәясәт буенча киңәшчесе Ришат Хәмидуллин “Татар-информ” мәгълүмат агентлыгында узган матбугат очрашуында хәбәр итте. Моннан тыш, телевидениегә кабельле телевидение сыйфатында эшләр өчен Элемтә, мәгълүмати технологияләр һәм массакүләм коммуникацияләргә күзәтчелек итү буенча федераль хезмәт тарафыннан универсаль лицензия бирелгән. Телевидение татар һәм рус телләрендә тигез рәвештә сөйләр дип көтелә.
