Бүген Татарстан мөфтие Камил хәзрәт Сәмигуллинда кунакта мәчет төзү буенча инициатив төркем булды. Очрашу Казанның Галиев мәчетендә узды. Бер зур гаилә – Сөниевлар – чыгышлары белән Алексеевски районыннан, хәзер Татарстанның һәм Россиянең төрле почмакларында гомер итәләр. Алар бергә Камил хәзрәт бүлмәсендә җыелып, туган авылларында мәчет төзү өчен аның фатихасын алдылар. Мөфти кунакларга үзенең тәкъдимнәрен җиткерде, мәчеткә керү-чыгу юллары, корбан чалу урыннары, балалар мәйданчыгы һәм уку класслары белән тәэмин итүнең әһәмиятен билгеләде. “Безнең сөекле Пәйгамбәребез салләллаһу галәйһи вә сәлләм болай дигән: “Кем Аллаһы ризалыгы өчен мәчет төзесә, шуңа Аллаһы җәннәттә йорт төзер”, – дип ассызыклады мөфти. Ренат Сөниев һәм Розалия Сөниева, шулай ук аларның уллары һәм туганнан туганнары Камил хәзрәткә очрашу өчен рәхмәт белдерделәр.
