Татарстан мөселманнары Диния нәзарәтенең “Зәкят” хәйрия фонды директоры Ирек хәзрәт Җиһаншин Мәүлид бәйрәмен оештыруда ярдәм күрсәткән спонсорларга рәхмәтен җиткерде. Кешеләрдә игелеклелек, мәрхәмәтлелек сыйфатларын зурлый торган мондый чараларның беренче тапкыр гына узмавын ассызыклады. Узган елны көз көне Горкинско-Ометьевский паркта балаларны җыеп бәйрәм оештырылган иде.
– Хәйрия фондыбызның төп максаты – мохтаҗ, авыр хәлдә булган балаларга ярдәм кулы сузу. Аларның йөзләрендә елмаю булса, без үзебезнең максатыбызга ирешкән булырбыз, ин шә Аллаһ. Без әти-әниләргә, балаларга һәр көнне булышырга тырышабыз, безгә зур вазыйфа йөкләнгән. “Зәкят” фондында көн саен мохтаҗлар өчен киемнәр кабул итәбез һәм аларны мохтаҗларга, авыр хәлдә калучыларга таратабыз. Безгә һәр көнне киләләр. Кешенең теленә, диненә, тән төсенә карамастан, ярдәм кулы сузарга тырышабыз. ДЦП белән авыручы, аутизм, Даун синдромы белән интегүче балаларга телевидение, социаль челтәрләр аша ярдәм итү юлларын эзлибез, – дип белдерде Ирек хәзрәт Җиһаншин.
