Бүген Арча районының Наласа авылы мәхәлләсе “Мәрҗәни оныклары” дип исемләнгән шәкертләр бәйгесен үздырды. Бәйгедә Наласа, Субаш-Аты, Югары-Аты авылы балалары катнашты. Чара бөек галим, дин әһеле Шиһабетдин Мәрҗәнигә 200 ел тулуга багышланды. Шәкертләр бәйгесендә 4 төркем көч сынашты: “Мәрҗәннәр”, “Нур”, “Энҗеләр”, “Җәннәт юлы”. Катнашучыларны Коръән аятьләрен уку һәм язма рәвештә кагыйдәләрне билгеләү, гакыйдә, фикһ, әхляк, сира фәннәре буенча, Аллаһы Тәгаләнең күркәм исемнәрен язуда сынадылар.
Бәйгедә беренче урынны “Энҗеләр”, икенче урынны “Мәрҗәннәр” командасы яулады, өченче-“Җәннәт юлы” һәм дүртенче булып “Нур” командасы калды. Җиңүчеләргә кыйммәтле бүләкләр тапшырылды.
