Бүген Татарстан мөфтие эшлекле сәфәр белән Әлмәт районында. Ул бүген биредә мөселман өммәте белән очрашты һәм Әлмәт Җәмигъ мәчетендә үткәрелгән 250 кешелек ифтарда катнашты.
Татарстанның Көнчыгыш төбәге казые, Әлмәт районы имам-мөхтәсибе Фәһим хәзрәт Әхмәтҗанов Татарстан мөфтиен райондагы дини вәзгыять, мөхтәсибәт һәм Р.Фәхретдин исемендәге Әлмәт мәдрәсәсе эшчәнлеге белән таныштырды.
Камил хәзрәт Сәмигуллин Әлмәт районы мөселманнарын Изге Рамазан ае белән тәбрикләп, вәгазь-нәсыйхәт сүзләрен җиткерде. Ураза тотуның фазыйләтләре, файдалы гамәлләр, изге эшләр башкаруның әһәмияте турында сөйләде. Әлеге очрашуда Әлмәт районы мөселман активы, мәдрәсә шәкертләре, имамнар, шәһәр аксакаллары катнашты. Очрашу ахырында мөфти хәзрәт 2017-2018 уку елында мәдрәсәне уңышлы тәмамлаган шәкертләргә дипломнар тапшырды. Мәдрәсәнең көндезге бүлеген 14, кичке бүлеген 11 шәкерт тәмамлады. Шулай ук татар теле курсларына йөреп, белем үзләштерүчеләргә сертификатлар бирелде.
Мөфтинең эшлекле сәфәре Җәмигъ мәчетендә узган ифтар белән төгәлләнде.
