Татарстан мөфтие Камил хәзрәт Сәмигуллин якынлашып килүче Ураза бәйрәме уңаеннан котлаулар кабул итә. Шулай итеп, үзенең ихлас теләкләрен республика мөселманнары башлыгына Палестинаның Баш казые, Палестина Президентының дин эшләре буенча Киңәшчесе Мәхмүд Сәдки Әл-Хабаш белдерде. “Аллаһы Тәгалә сезне һәм өммәтебезне иминлек, бәрәкәт белән бүләкләсен һәм Үзенең рәхмәтен ирештерсен”, – диелә казыйның рәсми хатында.
Камил хәзрәт Сәмигуллинга котлаулар шулай ук Казахстанның Баш мөфтие Сәрикбай хаҗи Ораздан, Халыкара ислам миссиясе рәисе Шәфикъ Пшихачевтан, Кавказ мөселманнары идарәсе башлыгы Аллаһшөкер Пашазадәдән, Ханты-Мантийский автономияле округы мөфтие Таһир хәзрәт Саматовтан, Казан мэры Илсур Метшиннан һәм башкалардан килде.
