30 июньдә шимбә көнне Аксубай районы Иске Кыязлы авылында икенче тапкыр балалар өчен мөселман Сабантуе узды. Аксубайлыларны Татарстан Мөфтиенең беренче урынбасары Рөстәм хәзрәт Вәлиуллин сәламләде һәм нәниләргә сәламәт булып үсүләрен теләде. Нәни мөселманнарны бәйрәм белән Аксубай районы имам-мөхтәсибе Равил хәзрәт Зөфәров һәм район имам-мөхтәсибләре дә котлады. Милли татар бәйрәмендә ата-аналар, тирә-яктан килгән кунаклар да катнашты. Балалар өчен төрле уеннар, ярышлар, конкурлар оештырылды. Сабыйлар аттракционнарда, батутларда сикерделәр, Сабантуй уеннарында сынаштылар һәм бүләкләр алдылар. Әлеге күркәм чарада балаларны баллы күтәнәчләр һәм төрле тәм-том белән сыйладылар.
