2018 елның 22-29 июлендә Болгарда VI мөселман яшьләре форумы узачак. Еллык слётта 18 яшьтән алып 35 яшькәчә булган яшь мөселманнар катнаша. Форумның махсус кунагы – галим һәм остаз Әбу Әли Әл-Әшгари. Форум көннәрендә катнашучылар ислам дине нигезләре, хәдис гыйлеме, гакыйдә һәм фикъһе буенча белем алачак. Дәрес һәм лекцияләрдән тыш, белем үзләштерүчеләрне бай эчтәлекле күңел ачу программасы көтә: викториналар, мастер-класслар, тренинглар, күңелле стартлар һәм төрле спорт ярышлары. Форум борынгы Болгарның палатка шәһәрчеге территориясендә урнашачак.
18 июльдә “Татар-информ” мәгълүмат агентлыгында “VI мөселман яшьләре форумы турында” матбугат конференциясе узачак. Журналистларның сорауларына Татарстан мөфтие урынбасары Илфар хәзрәт Хәсәнов һәм Татарстан мөселманнары Диния нәзарәтенең социаль үсеш бүлеге җитәкчесе Айгөл Биктимирова җавап бирәчәк. Башлана 11.00 сәгатьтә.
