Татарстан хаҗиларының бу көннәрдә гыйбадәт кульминациясе дияргә була. Язганыбызча, кичә алар Гарәфәдән Мөздалифәгә килде. Бүгенге төнне мосафирлар ачык һавада кунды. Шушында ук Җәмәрат өчен ташлар җыйдылар.
Иртәнге намазны Мөздалифәдә укып, хаҗилар Минадагы чатырларына киттеләр. Бераз гына ял иткәннән соң татарстанлылар шайтанга таш атар өчен Җәмәратка юнәлде һәм бу эшне яхшы гына башкарып чыкты. Таш ату әле алдагы ике көндә дә булачак. Әмма ихрам халәтендәге гамәлләр шушының белән тәмам. Хаҗи егетләребез җәмәраттан кайтуга һәм корбан чалыну турында хәбәр алуга чәчләрен кырдылар һәм ихрамнан чыктылар. Изге җирләрдә гыйбадәтләр әле дәвам итә. Республикабыз хаҗилары турында яңалыкларны Татарстан Диния назәрәте сайтыннан күзәтеп барыгыз.
Данил Сәфәров, Арслан Ганиев.
