Бүген Яшел Үзәндә Казыйлар шурасының чираттагы күчмә утырышы узды. Чарада Татарстан мөфтиенең беренче урынбасары Рөстәм хәзрәт Вәлиуллин, республиканың баш казые Җәлил хәзрәт Фазлыев, мөхтәсибләр һәм имамнар катнашты.
Утырышта быел оештырылган хаҗ буенча нәтиҗәләр ясалды, бу уңайдан имамнарның һәм хаҗилар төркемнәре җитәкчеләренең теләк-тәкъдимнәре тыңланды. Билгеле булганча, быел намуссыз туроператорлар гаебе белән, акча түләп тә, хаҗга бара алмый калган мөселманнар булды. Утырышта әлеге мәсьәләгә аерым игътибар бирелде.
Моннан тыш, узган корбан гаете йомгаклары буенча да тәкъдимнәр җиткерелде. Шулай ук Яшел Үзән районы мөхтәсибәте эшчәнлегенә кагылышлы сораулар каралды.
Казыйлар шурасы утырышлары ай саен уздырыла.
