Иртәгә, 19 октябрьдә, 11.00 сәгатьтә Лаеш районы Усад авылында “Ихлас” мәчете ачылышы тантанасы узачак. Әлеге чарада Татарстан мөфтие Камил хәзрәт Сәмигуллин, Лаеш муниципаль районы башлыгы Михаил Афанасьев, Лаеш районы имам-мөхтәсибе Рәфкать хәзрәт Гатауллинның катнашуы көтелә.
Гыйбадәт йорты 250 кешегә исәпләнгән. Гомуми мәйданы 606 квадрат метр. Яңа мәчет чорма белән дүрт каттан тора. Манараның биеклеге – 40 метрга якын. Мәчет халык һәм иганәчеләр ярдәме белән төзелгән.
Усадта беренче һәм бердәнбер мәчет төзелеше 2016 елның октябрь башында башланды. Җирле мәхәллә мәчетне бер ел эчендә төзеп бетерде дип әйтергә мөмкин. Тагын бер ел эчендә аны матурлау эшләре алып барылды: мәчет әйләнәсе төзекләндерелде, койма куелды, цоколь каты балалар көрәше өчен секциягә җиһазландырылды, машина кую урыннары эшләнде, балалар мәйданчыгы, мини-футбол, волейбол һәм баскетбол уеннары өчен мәйданчык ясалды.
Иртәгәсе көннән Лаеш районында 24 мәчет эшли башлаячак.
